غرق اولموش گمی یم عمان ایچینده
له په لر اوینادیر دریادا منی
عؤمروم گونوم نئجه کئچدی بیلمه دیم
غم ائله چولغادی دونیادا منی
فقط تئز آیریلدیم شن حیاتیمنان
بلکه یوز اوخ کئچیب یئددی قاتیمنان
فلکده دوشوردو کؤهلن آتیمنان
قویدو بو یوللاردا پیادا منی
بیرطرفدن دؤشمن کسدی یولومو
بیرطرفدن دؤران قیردی قولومو
جان دئین دوستلاریم سوروب حالومو
سالمادی بیر دفعه نه یادا منی
غیرتی هرکسین جانیندا گزین
جسمینده قلبینده قانیندا گزین
کامیلی درد اهلی یانیندا گزین
نادان نان سوروشما مبادا منی
کامیل طبیب
گمی:قایق
له په: موج
دئمه قابار قابار، جدارجدار دی
گل سیخیم سینه مه،گول اللرینی
گؤرورم تازاجا یویوب گلیرسن
آلا دستمال وئریم، سیل اللرینی
اینک ده ساقیبدی، دوماندا چنده
چیچک ده دریبدی، شه ده، چمنده
اختیار اولسایدی، اگرکی منده
قیزیله بلردیم بیل اللرینی
بهمن، یادیما او وعدن دوشوب
اؤرگین اودوندان، ساچا دن دوشوب
او گؤنلر اؤتوشوب، ایندی گئن دوشوب
قاریدیب قوجالدیب، ایل اللرینی
بهمن وطن اوغلو
فرهاد اؤلوب گلمیر کولونگون سسی
سن نه گؤزله ییرسن آی شیرین-شیرین
عاغلیما گلمه ین، باشیما گلدی
الف قدیم اولدو، یای شیرین-شیرین
پریشان تئل کیمین، داراغیندایام
یوسف تک زلیخا، فراغیندایام
عاریف انسانلارین سوراغیندایام
پاپانمیرام سنه تای شیرین-شیرین
خان کرم دیلیمده، اصلی ازبریم
عباس پری دئییر، ملک منظریم
بیر آدین گؤلگزدی منیم دیلبریم
جار سالدیم دؤنیایا، های شیرین-شیرین
مجنون کؤنوللویم، داغدا گزه رم
لیلی سیز عالمده نئجه دؤزرم
ائل اوغلو آیازام بئله یازارام
ائیله دین عؤمرومو زای شیرین-شیرین
ائل اوغلو
سیزیلتین سینه مده خوشوما گلمیر
آغریما اؤرگیم، آغریما هله
بلنچیک ظارافات ایله مگ اولماز
باتیرما نِشتری باغریما هله
آغریما اؤرگیم آغریما هله
من نه یاتمیشام کی، نه یؤخو گورم
مؤهلت وئر آماندی چوخ دربدرم
بلکه ایناممیرسان، دئیه بیلمیرم
منیم یالانیما دوغروما هله
آغریما اؤرگیم آغریما هله
بیر آرزیم قالیبدی گوی چاتیم اوندا
نه قدر ایسته سن آلیشدا یاندا
گَل یازیق کامیلین یاری یاشیندا
کئیفینه سوقانی دوغراما هله
آغریما اؤرگیم آغریما هله
کامیل طبیب
ازلدن منیم کی دؤز گتیرمدی
بیرداملا سیزقاما داشقین دئدیلر
ییخیلدیم قولومدان توتان اولمادی
عاقیلسیز دئدیلر چاشقین دئدیلر
بیر یئتیم دویؤلدو لئح کیمی جومدوم
بیر وارلی چاقیردی گؤزومو یومدوم
کیمه کؤنول وئردیم محبت اومدوم
بیزه لازیم دئییل عشقین دئدیلر
گؤر بو قوجا دؤنیا نه سر ائیله دی
«کامیلی» یوللاردا یئسیر ائیله دی
گئج گلدیم یاغی لر اسیر ائیله دی
تئز گلدیم آدیما قاچقین دئدیلر
کامیل طبیب
آ بوستانچی! بوستانینا گووه‌نمه
دونیا اؤزی بوستان اکه‌ن دونیادی
آغلار قویوب آناسینی، تورپاغین
بره‌که‌تینی گؤیه چکه‌ن دونیادی
اَیری‌سیده، دوغروسودا یالاندی
یول کسیب بختی الده‌ن آلاندی
ایلان کیمی قیوریلاندی، چالاندی
لئیله‌ک کیمی تئز-تئز سَکه‌ن دونیادی
سن گؤینه‌مه اؤزی چکسین دردینی
شئش وئرسه‌ده گل اویناتما مردینی
یاشاتمادی نسیمی تک مردینی
باش آپاران زهره تؤکه‌ن دونیادی
سوراخ بیته‌ر، سیرر گیزله‌نه‌ر، سؤز باتار
گونه ش دوغار عزیزله نه ر تئز باتار
آی زلیـم‌خـان دیش تـؤکـوله ر،اوزباتار
قوردوغونو بیر-بیر سـؤکـه‌ن دونیـادی
بهمن وطن اوغلو
آیریلیق، اؤغور اولسون یؤلونا
بوندان سؤنرا سئومه ییندن منه نه؟
خاطیریمده گؤز یاشلارین قالاجاق
کینایه لی گولمه ییندن منه نه؟
هر گوناهین قباحتین بیلمه دین
محبّتین یولو چتین، بیلمه دین
بو سئوگی نین سعادتین بیلمه دین
بوندان سؤنرا بیلمه ییندن منه نه؟
خاطیره ن یؤخ عؤمروم بویو ساخلاییم
دیء، هارداسان، هر دن گلیب یؤخلاییم
گؤزلریمده یاش قالماییب آغلاییم
بوندان سؤنرا سیلمه ییندن منه نه؟
قؤپوب گئتدی سؤن اومیدین یارپاغی
حسرت اَکیب، درد بؤیودور تؤرپاغی
سن اؤلمادین دردلریمین اؤرتاغی
بوندان سونرا بؤلمه ییندن منه نه؟
بو سئوگی ده دوز سؤزونو گؤرمه دیم
اؤزگه اؤلدون هئچ اؤزونو گؤرمه دیم
ساغلیغیندا خوش اوزونو گؤرمه دیم
بوندان سؤنرا اؤلمه ییندن منه نه؟
نصرت کسمنلی
حیات, یئنیش یوخوش بیر یؤلا بنزر
عاریفده عاقیلده نادانده گئدیر
بیزه نعمت وئرن تورپاق آلتینا
یوز یوز, مین مین انسان بیر آندا گئدیر
اونون قانونوندا عدالته باخ
مزارده یاندیر میر هئچ کیمه چراخ
کیملیگین سوروشمور او قارا تورپاخ
اؤنا خاندا گئدیر چوباندا گئدیر
دردیله مؤحنت دیر آی انسان اوغلو
باخدیقجا بهمنین گوزلری دؤلو
حئیف , عمور آددا بو گؤزل یؤلو
قاممایان دا گئدیر. قانان دا گئدیر.
بهمن وطن اوغلو
گوش اولوب گئدیرم آران یئریمده
یایلاق مندن اؤتور،داغ یئری ساخلا
چکیم سئغالیمی کؤرپه گوللره
باغبانلیق عشقینه، باغ یئری ساخلا
یئللره یئم اولور سوموگوم اَتیم
وطن سیز غریبم, تؤرپاقسیز یئتیم
(آنا داغلار) قؤی سنین قؤینوندا برکییم بیتیم
کؤدن اوزولمز تاغ یئری ساخلا
یئرییر اوستومه غم قوجاق, قوجاق
سولان بیر یارپاغام, سؤنن بیر اوجاق
قبریمی قازماغا بیر پارچا تورپاق
کفنیم اولماقا، آغ یئری ساخلا
زلیم خان
چوُره ک نه لازیمدی،سو نه گرک دیر؟
هر گون اوُز ایچینی یئیه ن آداما،
لیباس آختارمایین،پالتار گزمه یین،
دردی پالتار کیمی گئیه ن آداما
کیمی یه گول وئریر،چیچک گوُسته ریر
کیمی یه اود وورور شیمشک گوُسته ریر
زامان آددیم باشی دیرسه ک گوُسته ریر
دیزینی یوخوشلار دوُیه ن آداما
آرخاسی،آناسی،آتاسی یوخدور
گوللری سارالیب بوتاسی یوخدور
فرهاد کولونگونون خاطاسی یوخدور
باشی داشدان-داشا دیه ن آداما.
زلیمخان یعقوب
درباره این سایت